Бәлки, минән аҡыллыраҡтыр һин

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Бәлки, минән аҡыллыраҡтыр һин,
Тик был аҡыл миңә күңелһеҙ.
Үҙем нисек, шулай булғым килә,
Ә ҡалғаны, сүптәй, еңел һүҙ.

Кеше тыуған саҡта уйламаған
Нисек итеп хәйлә ҡорорға,
Мәжбүр булған тик башҡалар менән
Үҙ-үҙенә ек-ят булырға.

Шундамы һуң уның тантанаһы,
Бәхет сиген шунда тойғанмы?
Юҡ, ул бары үҙен алдаған тик
Һәм алдаған яҡты донъяны!