ИЛ ТОЙҒОҺО
Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Ил тойғоһо иргә миҙал түгел –
Муйынына тағып йөрөргә.
Ил тойғоһо ирҙең намыҫында,
Йөрәгендә йөрөй гел бергә.
Тәнемдәге һәр бер күҙәнәгем
Ил тойғоһо менән тулғанда,
Тамаҡ ярып ниңә ҡысҡырырға,
Ниңә миңә миҙал, туғандар?
Ил тойғоһо – бар тормошом минең,
Тын алышым, йөрәк тибешем,
Ул ғазабым, ул хазинам минең...
Һәм иҫбатлар уны тик эшем.