ВАҠЫТ
Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Ваҡытың юҡ һинең һәр ваҡытта –
Бушҡа үткән йәшлек ваҡытың.
Шуның өсөн ваҡыт урлайһың һин,
Бик күптәрҙе бушҡа ялҡытып.
Ваҡытың юҡ һинең һәр ваҡытта –
Гел сәғәткә ҡарап тораһың.
Сәғәтеңде алға борам, тиеп,
Гел ваҡытты артҡа бораһың.
Ваҡытың юҡ һинең һәр ваҡытта –
Ваҡыттан һин артҡа ҡалаһың.
Ваҡытында бик күп ваҡытыңды
Бик ваҡытһыҙ һыуға һалғанһың...