ӘКИӘТ
Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Әкиәтһеҙ бала – бала булмай.
Мөхәббәтһеҙ – шағир шиғырһыҙ.
Әкиәтемде тартып алмаһаңсы,
Ҡалдырмасы мине һин йырһыҙ.
Тик әкиәт кенә булһын һөйөү,
Мин барыбер уға табынам.
Әкиәтем әгәр юҡҡа сыҡһа,
Мин сығарам уны яңынан.
Гел ышанғым килә мөғжизәгә,
Ышанысһыҙ күңел – ул йырһыҙ.
Әкиәтһеҙ бала – бала булмай,
Мөхәббәтһеҙ – шағир шиғырһыҙ!..