Беләм, иркәм, беләм, ниңә һинән
Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Беләм, иркәм, беләм, ниңә һинән
Юҡ икәнен сәләм-хаттарың.
Сөнки мин бит өнһөҙ, вәғәҙәһеҙ,
Һәм юҡ һиңә биргән анттарым.
Беләм, иркәм, беләм, ниңә һинең
Юҡ икәнен сәләм-хаттарың.
Йөрәгемдә минең йәшәһәң дә,
Минең хаҡта түгел аһтарың.
Онотҡанда тик бер киләм һиңә,
Хәтер дәфтәреңде аҡтарып.
Хаттар яҙып, хаттар көтөргә лә
Юҡтыр, бәлки, шуға хаҡтарым.