Бала булып булмай, тик бала саҡ

Бала булып булмай, тик бала саҡ –
Һәр саҡ ҡайтып килә торған ил,
Күңел гөлдәреңдең саңын ҡағып,
Мәңге сафлап, наҙлап торған ел.

Һин донъяны яҡын күргең килһә,
Бала күҙе менән баҡ уға:
Донъя шундай сағыу, шундай ғәжәп,
Иҫең китерлек бит донъяға!

Ҡояш сыға, сыҡ-сыҡ, тиеп, һаман
Болоттарға һуҙһам ҡулымды.
Ҡояш! Әй һин, балалыҡ ҡояшым,
Ғүмер буйы яҡтырт юлымды!