ТУБЫРСЫҠ

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Улым Азаматҡа

Уйнайһың һин уйынсығың менән,
Уйынсығың, улым, тубырсыҡ.
Уйнатҡаның ни ул – белмәйһең дә,
Булһын ғына һиңә уйынсыҡ!..

Йоҡлайһың да тағы уйнайһың һин,
Бар тормошоң әле уйында.
Ғүмер бирҙек һиңә, кем булырһың?
Ошо һорау сыҡмай уйымдан.

Күпме көстө һалыр кәрәк әле
Һиңә кеше булыр өсөн дә.
Киләсәктә шаулар ҡарағай бит
Ята шул тубырсыҡ эсендә!..