Комсомолда һуңғы көнөм бөгөн

Комсомолда һуңғы көнөм бөгөн,
Һуңғы көнө ун биш йылымдың.
Китәм һинән, ләкин алып китәм
Мин йәшлеген ғүмер юлымдың.

Мин бит һиндә йәшем менән түгел,
Ә йәшлегем менән йәшәнем.
Билетымды шуға тапшырмайым,
Һаҡлап ятһын йәндең йәш мәлен.

Хуш, комсомол! Бир ҡулыңды, дуҫҡай,
Тик онотма кәрәк саҡтарҙа,
Саҡыр мине, саҡыр ауыр саҡта,
Мин булырмын алғы сафтарҙа.