Ниндәй яҡын миңә

Ниндәй яҡын миңә
йәшәй белмәгәндәр:
Яраҡлаша, алдай,
көйшәй белмәгәндәр,
Хыялдарға, йырға,
уйға сумғандар.
Бер ҡарындан тыумаһаҡ та,
Яҡын миңә улар, туғандар.
Йыр йырларға көйҙәре бар,
Тик йоҡларға өйҙәре юҡ.
Баштары бар, йөрәге бар,
Аштары юҡ, терәге юҡ.
Дандары юҡ, ҡандары бар,
Табынмайҙар юҡ-барға,
юлдарға.
Тик барыбер һуңғы һүҙҙе
улар әйтәсәк,
Улар ҡулында тик
киләсәк!