ТУЙ ЙЫРЫ

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Һай!
Һеҙ пар килгәс, беҙ ҙә килдек,
Ҡотло булһын туйығыҙ!
Тормош туйҙан ғына тормаҫ,
Уртаҡ булһын уйығыҙ!
Ай-һай, туйығыҙ,
Уртаҡ булһын уйығыҙ!
Ҡайғыны ла, шатлыҡты ла
Бергә-бергә бүлегеҙ!
Был донъяла гөлдәр күркәм,
Өҙөлмәһен гөлөгөҙ!
Ай-һай, туйығыҙ,
Һыуынмаһын ҡуйынығыҙ!
Һеҙгә тағы беҙ теләйбеҙ
Бәхеттең мул өлөшөн:
Булғас булһын гөлөгөҙҙөң
Бер... биш-алты емеше!..
Ай-һай, туйығыҙ,
Әп итешеп ҡуйығыҙ!..