Ниндәй шыҡһыҙ, һалҡын һары таң был

Ниндәй шыҡһыҙ, һалҡын һары таң был,
Яланғас ел генә күгендә...
Бәлки, һуңғы ҡабат килгәнһеңдер,
Йән өшөткөс бушлыҡ күңелдә.

Гүйә, донъя – моңһоҙ бер һыбыҙғы,
Буш һыбыҙғы – елдәр өрөргә.
Ниҙер үлде» ниҙер һүнде унда,
Кире ҡайтмаҫ өсөн ғүмергә.

Күңелдә тик ауыр юшҡын ғына,
Әрем әсеһе тик ирендә...
Ниндәй фәҡир, ниндәй ярлы кеше,
Йыр юғалһа күңел түрендә!..