Һәр тарафым тулы мөхәббәт бит

Һәр тарафым тулы мөхәббәт бит,
Һәр сәскәлә, һәр ҡош телендә...
Ә ниңә мин бер һандуғас түгел
Мөхәббәттең бәллеү гөлөндә?
Тормош даръяһында ҡая һымаҡ
Минең шулай баҫып торошом.
Тик ҡайҙа һуң йырҙарымда минең
Шул шау тулы тормошом?
Аҙмы моң-йырҙары, һүҙ йәйғоро
Ҡамап алған тирә-яғымды!..
Йөрәктәрҙе өттө ялҡыны...

Ә мин торам, өнһөҙ-һүҙһеҙ ҡалып,
Йота алмай ошо ағымды...
Муйынымдан һыуға сумған көйө
Сарсап, янып, һыуһыҙ интегәм.
Бар донъяһын һемереп эсер инем,
Ҡулым етмәй һиңә, Етегән!..