Бәлки, минең һуңғы һөйөүҙер был

Бәлки, минең һуңғы һөйөүҙер был,
Һуңғы балҡыуылыр күҙемдең?
Ғәйепләмә минең сәйерлекте,
Яҙға әйләнеүен көҙөмдөң.

Шундай сағыу был көҙ, әкиәт-көҙ,
Әйтерһең, ул сабый һүрәте!..
Яна, яна мең-мең буяу менән,
Алтын ялҡындарын көйрәтеп.

Тиҙҙән, тиҙҙән уттай йәшеллектең
Тороп ҡалыр бары ҡау-ҡыуы.
Ләкин ниндәй мәғрур, тантаналы
Әкиәттең ошо балҡыуы!..