Юҡ, инәкәй, мин хыялый түгел

Юҡ, инәкәй, мин хыялый түгел,
Тик эҙләмәм юлдың еңелен.
Үтә яҡын миңә үткән юлдар,
Үткәндәрҙә – минең күңелем.

Яландарҙа – башаҡ йыйған ерҙә,
Ҡыр тауығы гөрләр еремдә.
Икәүләшеп бесән сапҡан үрҙә,
Сәй ҡайнатҡан талдар төбөндә.

Балтырғандар, бәбәктәрен һуҙып,
Еҫ аңҡытып торған ҡулдарҙа,
Һирәк-һаяҡ күңелең ташыуынан
Һин йырлаған туған йырҙарҙа.

Юҡ, инәкәй, мин байлыҡҡа ҡарап
Ҡорманым шул үтер юлымды.
Миңә һәр саҡ изге өлгө булды
Бөтмәҫ эше талмаҫ ҡулыңдың...