Ун йыл үткәс, ҡапыл осраштыҡ беҙ

Ун йыл үткәс, ҡапыл осраштыҡ беҙ
Урамында ят бер ҡаланың.
Ят бер тауыш ниҙер һөйләһә лә,
Мин үткәндә тороп ҡаламын;
...Аға ине томан Йүрүҙәндә,
Аҡ толомон айҙан таратып.
Беҙ ултырҙыҡ ярҙа таң атҡансы,
Әллә былай, әллә яратып?..
Әле иҫтә тулҡын сайпылыуы,
Әрем еҫе иҫтә ҡулыңдың.
Зәңгәрлеге иҫтә күҙҙәреңдең,
Йомшаҡлығы етен толомдоң...
Ун йыл үткәс тағы осраштыҡ беҙ
Урамында ят бер ҡаланың.
Ҡойолһа ла тирәк япраҡтары,
Мин үткәндә тороп ҡаламын...