Ергә ятып бер илайһы ине

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Ергә ятып бер илайһы ине,
Бер илайһы ине туйғансы,
Сабый саҡтағылай, үкһеүеңде
Иң изге йән килеп тыйғансы.

Юҡ, хәҙер һин үкһеп илаһаң да,
Һис кем килеп инде йыуатмаҫ,
Һиҙгер ҡулы менән сәсең һыйпап,
Сеү, балам, тип инде һүҙ ҡатмаҫ.

Ә шулай ҙа бер илайһы ине,
Аңлар ине, бәлки, Ер-әсә.
Тик күҙеңдә инде йәш ҡалмаған,
Ир күҙе тик ҡорос нур сәсә...