АҠ СӘПСЕК
Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.
Аҡ сәпсеккәй осоп килде лә шул,
Аҡ ҡойроғо менән боҙ ярыр;
Аҡ ҡойроғо менән боҙ ярыр ҙа –
Аҡ күперкәй ярҙан ҡуҙғалыр.
Аҡ сәпсеккәй осоп килде лә шул,
Аҡтарылып, шаулап боҙ китер;
Аҡтарып та алып йөрәгемде,
Артҡайынан туйлап ҡыҙ китер.
Аҡ сәпсеккәй осоп килде лә шул,
Аһ, нишләйем, күпер ҡуҙғалыр;
Аһтарымды белмәй, күңелемә
Аҡ сәпсеккәй утлы ҡуҙ һалыр!..