Ергә бөгөн шундай моңһоу ҡарай

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Ергә бөгөн шундай моңһоу ҡарай
Ҡара болоттарҙың тотҡоно – ай.
Көн ҡыуанлап, ҡойон ҡотора,
Күңел болоҡһотоп тик тора.

Шахтер тәмәкеһен тешләһәм дә,
Көнө буйы ярһып эшләһәм дә,
Һис ҡәнәғәт түгел үҙемдән,
Толҡа юҡ был, ахыры, түҙемдән.

Өндәшмәйһең икән, һеңлем, ниңә?
Һин етмәйһең, ахыры, күңелемә, –
Таратыр ҙа инең болотто,
Һүндерер ҙә инең был утты...