ӨС КӨЙ

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Күҙ алдыма һының баҫыу була,
Көйләй башлай күңел өс көйҙө:
Йә Маскарад вальсы үкһей унда,
Йә һағышы – Огинскийҙың.

Йә хушлашам мәңге һинең менән,
Ватерлоо тигән күперҙә.
Тик үткәндәр, йәйғор күпер булып,
Тороп ҡала яңғыҙ үтергә.

Күҙ алдыма һының баҫҡан һайын,
Баҡҡан һайын һәр бер хатыңа,
Өҙгөләнә өс көй, үкһей миндә
Өс сабыйҙың бәхете хаҡына...