ҺЫУҺЫЛЫУ

Һыу алырға төшкән баҫмаға,
Баҫмаға ул, гүйә, баҫмаған,
Һыуҙа уйнай ана кәүҙәһе...
Әйттермәһә Хоҙай тәүбәһен,
Һыу батшаһы булыр инем дә,
Эргәһенә сығыр инем дә,
Толомонан алып һылыуҙы,
Ярып китер инем был һыуҙы...

Ниндәй һын был һыуҙа тирбәлә,
Мөхәббәтме тула биҙрәлә?
Кемдең һуң ул яҡты өмөтө,
Ниңә килмәй һаман егете?
Шәфҡәт тә юҡ миңә, юҡ аяу.
Йөрәгемә ҡаҙай уҡ ҡаяу...
Ниңә шулай һыуға йылмая?..