АЛЫРЫМҠОШ МЕНӘН БИРМӘМҠОШ

Рәми Ғарипов – Сыңрау торна. Шиғырҙар, поэмалар. – Өфө, Китап, 2021. – 356 бит.

Алырымҡош менән Бирмәмҡош
Икән дәһә, ай-һай, был тормош:
Бала саҡтың сәмле уйыны
Оҙатып килә ғүмер буйына.

Алырымҡош икән аҡылым,
Бирмәмҡош – ул йөрәк ялҡыным.
Ғүмер буйы улар алыша,
Ғүмер буйы улар тартыша.

Алырымҡош ала алырын,
Бирмәмҡошо бирмәй ҡалырын.
Алырымҡош килһә шыҡыйып,
Бирмәмҡошҡа бигерәк эш ҡыйын.