Әллә мин бик иртә тыуғанмынмы

Әллә мин бик иртә тыуғанмынмы,
Әллә инде һуңлап тыуғанмын?
Бер килмешәк төҫлө был донъяла
Иманымды йәндән ҡыуғанмын.
Ниндәй заман?!
Ер менән күк төҫлө
Йәштәр менән ҡарттар араһы.
Тыңҡыш бер гитара тотоп,
Шул йәштәрҙең арттарынан
Миңә ләме әллә бараһы?
Ят та һәм яҡын да миңә ҡарттар,
Ят та һәм яҡын да йәштәре.
Әллә илдә ир уртаһы булып,
Йөкләгәнгә донъя эштәрен?