Күңел үлгән, күңел төңөлгән дә

Күңел үлгән, күңел төңөлгән дә
Тере хистәр күптән күмелгән.
Бер ниндәй көн, бер ниндәй төн хатта
Серле уйҙар һалмай күңелгә...

Күңел, гүйә, көнгә тороп ҡалған
Мәғәнәһеҙ, ғәмһеҙ ярты ай.
Аҡтарылып боҙҙар киткәндән һуң
Аҙашҡан бер боҙҙай ялтырай...

Ялтырай ай һалҡын күк йөҙөндә,
Кәрәкһеҙ бер ҡылыс шикелле.
Нуры ла юҡ, йыры ла юҡ уның,
(Тик үткәндәр генә һөйкөмлө)...