Әсәләрҙең күкрәк һөтө менән

Әсәләрҙең күкрәк һөтө менән
Йөрәктәргә ингән туған тел.
Ҡаныбыҙға һеңгән туған тел.
Бөтәбеҙгә беҙҙең иң ҡәҙерле,
Бөтмәҫ байлыҡ булып ҡалған тел.
Һин яҡшылап уйлап ҡара үҙең:
Нимәбеҙ бар унан нурлыраҡ?
Күкте иңләп алған йәйғорҙоң да
Буяуҙары унан ярлыраҡ.
Һис бер нигә уны тиңләйһе юҡ,
Тиңләйһе юҡ алтын-көмөшкә.
Үҙ байлығын үҙе йыйған хужа
Риза булмаҫ ине был эшкә.
Далалағы сасҡау һыуыҡтан да
Өткөсөрәк һүҙҙәр эҙләһәң,
Үҙ телендән эҙлә ундай һүҙҙе,
Кем ғәйепле таба белмәһәң?!