Яратам мин алһыу таң атыуын

Яратам мин алһыу таң атыуын,
Яратам мин шәфәҡ батыуын,
Яратам мин тәүге гөл ҡалҡыуын,
Яратам мин япраҡ яуыуын.
Яратам мин, иҫереп хуш еҫенә,
Ялан түшәгендә ятырға,
Ай эйелмәй тороп баш осома,
Ашыҡмайым һис тә ҡайтырға.
Сорнайһыҙ ҙа шулай, ҡурайһыҙ ҙа
Мин моңдарҙы тоя беләмен.
Шишмә буйҙарына ирекһеҙҙән
Юҡһа ниңә бик йыш киләмен?
Артыҡ бер ни кәрәк түгел миңә,
Ожмахтың да һис юҡ кәрәге.
Тик тауҙарға, ҡая битләүенә
Яҡыныраҡ типһен йөрәгем.