Тәүге һөйөү ниндәй тетрәткес һуң

Тәүге һөйөү ниндәй тетрәткес һуң,
Кәм түгелдер унан һуңғыһы?
Уҫаҡ япрағындай дерелдәй бит
Ҡосағыңда һинең һуңғы һын.

Ул һағайыр, аңға килер тиҙҙән,
Йәш килене булғас ауылдың.
Тик осрашһаҡ, тағы тертләп китер,
Хәтерләп был һуңғы дауылды.

Ул һарылмаҫ инде ҡосағыңа,
Сабыр була ауыл ҡыҙҙары.
Тик яныңдан өнһөҙ үтеп китер,
Ошо таңдай, йөҙө ҡыҙарып...