Өмөтһөҙ һәм мөхәббәтһеҙ тормош

Өмөтһөҙ һәм мөхәббәтһеҙ тормош
Шундай мәғәнәһеҙ бер нәмә:
Хыялдарҙан айнып, күҙем асһам,
Ҡайтҡан һымаҡ булам төрмәмә.

Тик һиҙмәйһең ығы-зығы менән
Унда үткән зая ғүмерҙе.
Күнегелгән шундай был төрмәгә,
Бөгөн килеп уны емерҙем.

Емерҙем дә етем булып ҡалдым,
Аңлайышһыҙ был хис күптәргә, –
Сөнки һәр кем ошо ауыр йөктө
Мәңге төшөрмәҫкә күтәргән...