Көтмәгәндә ҡапыл күҙ алдыңдан

Көтмәгәндә ҡапыл күҙ алдыңдан
Сыңлап уҙа бөтә тормошоң.
Үкенестән торһа һәр сылбыры,
Үтенестән тора тотошо.

Хайран-вайран ҡалып бөгөнгөңә,
Үткәнеңдән яуап эҙләйһең.
Юҡ шул яуап! Хата – хата көйө,
Барыр юлды бары күҙләйһең.

Күп ҡалғанмы ул юл? Нисә йыл ул?
Бармы өмөт, бармы бер маяҡ?
Сеү, берәү бит шунда йылмайғандай,
Яҡтырғандай була тирә-яҡ...