ҺУҢҒЫ ЯПРАҠ

Һуңғы япраҡ һыйғыр һабағынан
Өҙөлөп төштө йәш ҡар өҫтөнә.
Йәшеллеге үтеп, унда бары
Тороп ҡалған һары төҫ кенә,
Өҙөлөп төшкәс йәш ҡар өҫтөнә.

Килер бер көн: һинең ғүмерең дә
Тороп ҡалыр һуңғы япраҡҡа.
Һин дә аҙаҡ, ошо япраҡ һымаҡ,
Әйләнерһең ергә – тупраҡҡа,
Тороп ҡалғас һуңғы япраҡҡа.

Шул тупраҡтан тағы үҫеп сығыр
Мәңге йәшел тормош ағасы:
Шаулар япраҡ, һайрар һандуғасы!..
Кем һуң әйтер мине йәшәмәй тип,
Ышандырыр ниндәй ялғансы?..